عشان مفيش فايدة

تم إغلاق المدونة عشان مفيش فايدة

سعد قال مفيش فايدة

كلمة شهيرة نسبت لزعيم الامة سعد باشا زغلول

سعد قال مفيش فايدة

قبل سعد باشا كان مصطفى كامل بيقول لا يأس مع الحياة ولا حياة مع اليأس بس مصطفى مات من القهر لما عرف الحقيقة عرف ان مفيش فايدة مات للاسف فى عز شبابه مكملش 34 سنه

قبلة بشوية كان هوجة عرابى و حصل الكلام دة كلة كان فى الفترة من 1882 الى 1919

فصل اخر ثورة قام بيها المصريين فى سنة 1919 و ثورة الزراع فى العصر البطلمى ( عام 197) فى عهد إبيفانس ما يزيد عن 1700 عام و خلال هذة الفتر لم بيقم المصريين بأى ثورة او تذمر او اضراب

هل معنى هذا ان الحال فى هذة الفترة طوال 1700 سنة كان عال العال

مع ان البلد كانت فى فترة احتلال

من فرس وروم و مماليك و فرنسيس و اتراك و عثمانيين و الاسرة العلوية والانجليز

فى الفترة دى طوال اكتر من 1900 سنة لم يحكم مصر واحد من شعبها

واحد يعنى معاة باسبور مصرى يعنى

وكانت البلد بيتعملها الف حساب

كان ايام الاحتلال مصر فيها احزاب

كانت ايام محمد على حدود مصر من الجنوب لحد اثيوبيا ومن الشمال لحد اليونان

كان علم مصر فية 3 نجوم ( مصر والسودان و الحجاز)

كان زمان ابن الفلاح ممكن يبقى ظابط ( قبل ما مصر تبدأ فى زراعة الكوسة)

دلوقتى

الدنيا فل وعال العال

ولا حد بينضرب على قفاة ولا حاجة

ولا اللى بيضرب ينضرب

كان زمان ابن الفلاح ممكن يبقى ظابط ( قبل ما مصر تبدأ فى زراعة الكوسة)

بس دلوقتى خلاص


مفيييييييش فايدة

اكيد القطة اكلتها

طب يمكن انا مبعرفش احسب او يمكن الغلط فى النضارة اللى لابسها

بس اللى اعرفه ان الدولا دلوقتى 5.33 جنية

و قناة السويس الشهر اللى فات جابت نص مليار دولار

مش انا اللى بقول دة رئيس هيئة قناة السويس احمد فاضل اللى قال الكلام دة فى الخبر دة على موقع مصراوى

طيب كدة يبقى القناة الشهر اللى فات جابت 2,665,000,000 يعنى بحسبة بسيطة كدة يطلع نصيب الواحد فينا قد اية؟؟؟؟؟؟؟؟؟

سيبك من الملاليم دى

طيب فين الفلوس اللى لموها من الضرايب راحت فين

سيبك برضة الفلوس اللى باعوا بيها عمر افندى وبنك القاهرة

طب فلوس الغاز اللى باعوه لاسرائيل ( يمكن اسرائيل بتسحب الغاز ع النوتة لحد اوباما ما ينجح فى الانتخابات ويبعت لها حلاوة النجاح)

واع تفكر فى حاجة وحشة اكيد الحكومة محوشة الفلوس لينا فى حتة امان لغاية لما نبلغ سن الرشد
عشان عارفة اننا شعب مبذر والاسراف فى دمنا

او يمكن الفلوس كلتها القطة

او يحتمل خدها الغراب وطار

ولا الشعب يجب ان يكون فقيرا

فالفقراء يدخلون الجة

ربنا يخليك لينا يا ريس ويطولنا فى عمرك

زغرتى يا انشراح دا اللى جاى احلى من اللى راح

احنا مش عبيد

خلاص بقينا مدمنين طوارئ

احنا مش عبيد عشان نتحكم بالكرباج والعصاية

يللا خللى الشعب يعيش

والكل منتعش والكل منتشى 

الله على الحياة بقى لونها شفتشى 

أحنا لا صوتنا اتنبح ولا فى مالطة بندن

ماشى يا بنى ادمين

صحيح احنا شعب خيخة واى كلام

وفرحتوا بالفتافيت اللى الريس عشمكوا بيها

ابقوا قابلونى لو خدتم مليم

اه يا بلد

قوم يا مصرى

يا قوم هبوا انما العمر فرصة

بيع يا عواد

ستون عاما مرت منذ ان تم الاعلان عن قيام السرطان الصهيونى فى المنطقة العربية

تم اعلان الكيان الصهيونى ليفصل شرق الوطن العربى عن غربه

ليقطع الطريق من المحيط الى الخليج

و اليوم احتفلت الحكومة المصرية على طريقتها ب إس ر ا ئ ل

تبدا شركة الغاز المصرية الاسرائيلية الخميس بامداد اسرائيل بكميات تجارية من الغاز الطبيعي المصري بموجب عقد كانت قد وقعته مع شركة الكهرباء القطرية-وذلك حسبما أورده راديو اسرائيل.
وبموجب العقد الذي تساوي قيمته 2.6 بليون دولار ستقوم مصر بتزويد إسرائيل بـ 1.7 مليون متر مكعب من الغاز الطبيعي المسيل سنوياً لمدة 15 سنة.
ويجري تصدير هذا الغاز عبر أنبوب تحت مياه البحر المتوسط وسيبلغ مجموع الصادرات على مدى مدة العقد 15 بليون متر مكعب من الغاز الطبيعي.
وكان خط أنابيب تحت البحر طوله 100 كيلومتر قد بني لنقل الغاز من مدينة العريش المصرية في شمال سيناء إلى ميناء عسقلان الإسرائيلي.


و بقليل من المهارات الحسابية نجد ان متر الغاز الطبيعى يتكلف 93 قرش

وهذة التسعيرة ممتدة طوال 15 سنة

عمار يا مصر

احنا فى زمن الرويبضة

عادل إمام : ياريت جمال مبارك يرشح نفسه للرئاسة..وأنا حر في رأيي 4/30/2008 1:16:00 AM

القاهرة- أعلن الفنان عادل إمام عن قلقه علي مستقبل البلاد في القادم من الأيام معربا عن رغبته في أن يقوم جمال نجل الرئيس مبارك بترشيح نفسه لرئاسة مصر خلفا لوالده.

وقال في الجزء الثاني من حواره مع برنامج الحياة اليوم علي قناة الحياة الفضائية وبحسب ما ذكره موقع صحيفة المؤتمر: "يعجبني جمال مبارك وياريت يرشح نفسه للرئاسة وأنا حر في رأيي

يا ريت تخللى رأيك ده لنفسك انت مالك و مال مستقبل البلد ما هو امثالك هم اللى خربوا البلد.

صحيح ما هو الرجل الدلو يحب الدلو

ما تخليك فى الهجص اللى بتعمله دة و حل عن دماغنا انت فاكر نفسك فى فيلم من بتوعك ولا اية
شوف الهجايص هجص يا بنى منك له هو حد فاهم حاجة

صدق رسول الله صلى الله عليه وسلم
عن أبي هريرة رضي الله عنه قال: قال رسول الله صلى الله عليه وسلم:
((سيأتي على الناس سنوات خدّعات، يُصَدق فيها الكاذب ويُكذَّب فيها الصادق، ويُؤتمن فيها الخائن ويُخوَّن فيها الأمين، وينطق فيها الرويبضة))،

قيل وما الرويبضة يا رسول الله ؟ .. قال: «الرجل التافه يتكلم في أمر العامة».

انت فى بحر الظلمات

نقلا عن مصراوى

أكدا الدكتور سيد طنطاوي، شيخ الأزهر والشيخ يوسف البدري بعدم مشروعية الاضراب الذي دعت إليه قوي سياسية ومجموعات ناشطة علي الانترنت. ( يعنى انضرب على قفاك يا مواطن منك له بدون تذمر )

واختلف معهما بحسب ما ذكرته صحيفة المصري اليوم الدكتورة سعاد صالح والدكتور منيع عبدالحليم محمود اللذين رأيا جوازه، كصورة من صور التعبير عن الرأي واحتجاجاً علي الغلاء دون الإساءة لحقوق الغير.

وقال الدكتور محمد سيد طنطاوي، شيخ الأزهر، إن الإضراب لا يجوز من الناحية الشرعية، لأنه يعمل علي تعطيل المصالح العامة للمسلمين، وهو ما ترفضه الشريعة الإسلامية والأديان السماوية. ( يعنى احنا من بقينا من الفئة الضاله)

وأضاف طنطاوي، في تصريحات خاصة ل"المصري اليوم": "أنا شخصياً ذهبت إلي عملي وذهب كل العاملين في مشيخة الأزهر إلي العمل وأنني أدعو الناس إلي الذهاب إلي عملهم وعدم الاستجابة لمثل هذه الأشياء التي تضر أكثر مما تنفع".

وأشارإلي أن الإضراب يجب أن يكون بإذن من السلطات المختصة، لأنها الأحرص علي المصالح العامة حتي لا يقع الضرر علي المؤسسات والهيئات التي تعمل علي تسيير مصالح الناس.

ورداً علي سؤال عما إذا كان هناك فرق إذا كان الإضراب احتجاجاً علي الغلاء قال شيخ الأزهر: الدولة مسؤولة عن مكافحة الغلاء وهي لا تألو جهداً في ذلك، فهي تعلن جهاراً نهاراً أنها ضد الغلاء وتعمل علي مكافحته ، وعليه فلماذا الإضراب؟!

( يا سلام عليك يا أستاذ اية الحلاوة دة )

واتفق معه الشيخ يوسف البدري، الداعية الإسلامي، مؤكداً أنه لا يوجد في الإسلام شيء اسمه إضراب عن العمل أو مظاهرات لأن كل هذه الأعمال ليس لها سند في الأثر، وعلي الناس أن تذهب إلي العمل ولا تتوقف عن تسيير مصالحها.

وأضاف: لم يحدث علي مدار التاريخ الإسلامي أن حدثت إضرابات أو مظاهرات لا في عهد الرسول، صلي الله عليه وسلم، ولا في عهد الصحابة، ولم نسمع عن أناس أضربوا عن العمل بسبب ارتفاع الأسعار، وإنما كانوا يصلون لله ويرفعون أيديهم بالدعاء إلي الله لرفع البلاء بدلاً من تعطيل العمل.

(يا سلام عليك يا عم الحاج انت بتقارن عهد الصحابة بعهد مبارك)

وأشار البدري إلي أن ظاهرة الإضرابات مستحدثة ومستوردة من الخارج، ولا يجب أن نأخذ المساوئ المناوئة للشريعة ونترك المزايا.

( شفتوا الحلاوة والهنا اللى احنا فية )

ياترى مين وراهم

وراكم 80 مليون مصرى يسعون للتغير

ضربنى بوشة على ايدى يا سعادة البيه

هنا القاهرة

تم اليوم القبض على الفئة المندسة التى اثارت القلائل والفتن والتى لولا يقظة رجال الامن الشرفاء و افراد الشعب السعداء
والذين ادوا بفكرهم التخريبى الى قيام ثورة الجياع و ارادوا بهذا الشعب المطيع الهلاك

لكن الله سلم
ونحن من هذا الموقف نشكر رجال الامن والشرطة واولاد ابو اسماعيل على حسن تعاونهم معنا فى القضاء على هذة الشرذمة من الفاسدين والمارقين والمجموعة من الفئة الباغية التى اردات لنا الشر

ولا ننسى الجهد المبذول من رجال الاعلام والسادة اعضاء مجلس الشعب والشورى والمجالس المحلية والاخوة الاعداء على حسن تعاونهم معنا

والله الموفق

وشكرا لكم

شعبى البسيط المطحون المهاود

شوفوا الشر اللى بينط من نظراته

دة ايام ما كان عنده نظر

اما هذا الاثيم فقد كل معانى الانسانية وقام بالتعدى على رجال الامن الشرفاء الذين عاملوه بكل رفق وحسن تصرف ولكن الشر المتأصل داخلة أبى الا يكون من الفئة المندسة الباغية

و بسؤال الامن ما هى التهمة الموجههة لهذا المارق الاثيم المندس
اجاب : ضربنى بوشة على ايدى يا سعادة البيه

عشـان إنت مصــري لازم تعاني
وتفقـد كرامتــك بكـل المعــــــانى
وتحرق فى دمك سنين مش ثوانى
وإوعــى تصـــدق كـــلام الأغانـــى
بتـــاع الحضـــاره وكانـــى ومانـى

ده كله هجايـــص ومايدخـــل ودانى

طفى النور يا بهية كل العسكر حرامية

كسر يابنى كسر انت دافع فيها حاجة

عرفتوا مين بقى القلة المندسة

مع الحزب الوطنى مش ممكن تغمض عينيك

هو الكلام بفلوس

اكدب يابنى اكدب

معركة انتخابية ونزاهة و شفافية وحياد ايه بس

انت فى بحر الظلمات

يا لطيف اللطف يا رب

احنا بتوع الفنكوش

منكم لله كلكم

والله العظيم الشعب بتاعنا ده شوية عيال

إحنا بنوجع دماغنا ليه وبنحارب عشان مين

مش عشانكم يا عالم يافقر منك له

المحلة عملت ايه

عشان تاخد حقها

اوعى تصدق كلام بتوع الحكومة ان اللى حصل فى المحلة دة شغل قلة مندسة

ولا كلام الست الوزيرة و لا كلام رئيس الوزراء النضيف قوى

ولا ان عمال المحلة انضحك عليهم من الحكومة بمكافاة شهر

دى لو صدقت الحكومة نفسها تبقى ولا مؤاخذة حكومة من العالم الاخر

الناس زهقانة ي بنى ادمين

نرجع للموضوع

اية اللى خللى الشعب يعمل عيشة

يمكن عشان دى المرة الاولى اللى نقول فيها لا بجد

يمكن الفتوات الامنية بتاع الحكومة و نظام البلطجة اللة مايشة بيه خوف الناس

بس احنا خايفين من اية بعد كدة

احنا خايفين نموت

ما احنا بنموت بالبطئ

بس بصراحة

بينى وبينكم

انا فرحان

الحكومة اتهزت بجد

وفرحان اكتر فى الاخوان المـتأسلمون اللى استخبوا فى الجحور
عشان اللى بيهلل ليهم ميفتحش بقه بأى كلمه

من الاخر الناس فى المحلة قالت طز في الحكومة

طز فى نظيف

طز فى مهدى عاكف والاخوان بتوعة

ما شى احنا صيع صيع بس خدنا حقنا

لو كان الحكومة ماشية بنظام البلطجة هى الحل

فالمحلة رفعت شعار

مطواة لكل مواطن

مرسى بن المعلم الزناتى مش هينضرب تانى يا رجالة

على فكرة الريس كل دة فين

منك لله ياللى فى بالى

كفاية بقة كدة


ايوة كان عندى اكتئاب

من الهبل اللى بشوفة وبسمع عنة فى مصر


لمصلحة مين اللى بيحصل فى مصر دة

ولية عايزين يخربوا بيت المواطن المصرى المطحون

يعنى نعمل اية

المطلوب من شعب مصر يعمل هجرة جماعية ونشوف بلد تانية نسكن فيها

خلاص بقى شعار الحكومة انا هعمل اللى عايزاة واللى مش عاجبة يشرب من البحر
اهه ربنا مسهلها لينا وعندنا بحر احمر وابيض وبحر الرمال والنيل

يعنى رضينا بالهم والهم مش راضى بينا

العيش كويس وبالطوب والزلط والمسامير
بقى قد اللقمة قولنا حلو الحمد لله ببرضة نعمة من عند ربنا

قامو ا خللو العيش ممنوع
يعنى الواحد كره العيش والعيشة واللى عايشنها

انا مش عايز اكل لحمة

عايزين ناكل عيش



أضراب يوم الأحد 6 ابريل
عن الذهاب للعمل وعن الشراء وخصوصا عن الستة أشياء التى أرتفع ثمنها بدون أي مبرر
رغيف العيش , الأرز , الزيت , السكر , الشاي , البنزين

مطالب الشعب المصري من رئيسها محمد حسني مبارك :
أقالة كل من : رئيس الوزراء ووزير المالية ووزير الأقتصاد
وتحويلهم للمحاكمة بتهم الفساد و التسبب في خراب البلاد والتسبب في اصابة و موت الكثير من المصريين بسبب قراراتهم الفاشلة
أقالة وزير الصحة وتحويله للمحاكمة بتهمة عدم الرقابة على الأغذية الفاسدة التى يتناولها المصريين و خراب المستشفيات وصحة المصريين

أقالة جميع محافظين المدن الكبرى وخصوصا : القاهرة و الجيزة والإسكندرية
وتحويلهم للمحاكمة بتهمة الفساد وخراب المحافظات والشوارع و التربح من الوظيفة
زيادة مرتبات جميع الموظفين الحكوميين : ضباط الشرطة , عساكر المرور , ضباط الجيش , الموظفين الأداريين الحكوميين بمختلف تخصصاتهم , العمال الحكومييين بمختلف تخصصاتهم

تخفيض اسعارالسلع الغذائية والأساسية : رغيف العيش , الأرز , الزيت , السكر , الشاي , البنزين

حبة فوق وحبة تحت

يا أهل الله ياللى فوق ماتبصوا على اللى تحت
ولا عشان اللى فوق مش دارى باللى تحت

شوية كدة ويجيلى شلل رباعى من الكلام اللى بسمعة وبشوفه
اية الناس دى اللى بتتكلم الناس دى عايشة فين بالظبط

طيب الست الوزيرة لما تقول ان ما فيش فى مصر بطالة

قلت يمكن ماتقصدش
او يمكن انا فهمت غلط
او يمكن كلمة بطالة عند الناس اللى فوق مفهومها يختلف عن الناس اللى تحت
مع ان الريس وعد الشعب فى الحملة الانتخابية بالقضاء على البطالة
يمكن يقصد البطالة فى بلد تانية
ممكن
بس دى يا ناس حتى امريكا فيها بطاله
مش مشكلة
قالوا خصخصة القطاع العام
خصخصوا كل حاجة
حتى التامين الصحى
قلت اكيد هم عندهم وجهه نظر وانا نظرى ضعيف
ومش عندى نظرة مستقبلية
ولا حتى
فكر جديد
زى الناس اللى فوق
طيب يا صبر طيب
اخرتها قالوا العيش مافيهوش مشكلة ولا ازمة ولا حاجة

يا هل الله ياللى فوق انتم بتاكلوا كرواسون وباتونساليه

يعنى مالكوش دعوة بالعيش
اللى المطحونين امثالى بياكلوه

طيب لقينا فى العيش حشرات ودبابيس وطوب وزلط
ويمكن اسمنت كمان
قلنا ماشى الحمد لله
برضه نعمة

بس مانلاقيش العيش

طيب ناكل اية دلوقت
قعدت افكر اية اللى غلى العيش كدة
قلت
يمكن العيش غلى لما الاسمنت والحديد الداخل فى تركيب العيش غلى

ممكن

منك لله ياللى فى باللى

شعب عايش فى الغيبوبة

ايه الشعب دة يا ناس
طيبين قوى مش كدة
احسن من الشعب دة مفيش
خلاص النهاردة الناس نست كل همومها
والدنيا النهاردة وردى
واللحمة بخمسة جنية وساعات بستة
ايوه اكيد دى لا باظت ولا خربت
الدنيا حلوة
والجو جميل
والامن مستتب
بس احنا اللى مش فاهمين
خلاص الليلة عيد
النهاردة الليلة الكبيرة

النهاردة الاهلى والزمالك

سيبك من الغلا واحتكار الحديد والفساد والاستعباد
سيبك من الدهب اللى غلى
والحديد اللى بقى اغلى من الدهب
سيبك من غزةوفلسطين
ورغيف العيش والفقر والبطالة
سيبك من هيلارى واوباما
سيبك من الحاجات الهبلة دى

وركز كده
ومتنساش تدعى بعد صلاة الجمعة
وتوصى الشيخ فى الخطبة يدعى لابو تريكة عشان ربنا يشفيه ويلحق الماتش
متنساش تدعى بضمير

آه يا بلد آه
الرحمة من عندك يا رب

عادى

فى بعض الاحيان على الشخص العاقل ان يجرب لحظات من الجنون كعملية لا شعورية للتعبير على بعض المواقف التى تواجهه فى الحياة العادية , و تعتبر هذه اللحظات مجال للتنفيس عن القرف اللى الواحد شايفة طول ما هو عايش فى الدنيا حتى لو كان التعبير ده هيجيب له وجع الدماغ و هيخبط فى الناس, عشان الشعور دة زى الغلاية اللى تحت الضغط لو ملقتش مكان للتنفيس هتنفجرررررررررررر

بس خللى بالك اوعى تزعل او تغضب لإن الغضب حماقة يا حوريه زى مابيقول محمد صبحى و عم الحاج اللى عامل زى البرص الجعان يقول ما تقدرش

خللى روحك رياضية

تيييييييييييييييييييييييييييييييييت

لما اتفرج على الناس اللى كل همها ازاى الأهلى طلع من الكاس

و كرول بتاع الزمالك هيفضل ولا هيمشى.......... عادى

خلاص الدنيا وردى والناس عايشة فى بحبوحة من العيش ...... عادى

لما اقعد اتعلم 20 سنة وبعدين اطلع اتعين ( موظف اد الدنيا فى الحكومة) و أخد145 جنية ....................... عادى

لما تطلع علينا الست وزيرة القوى العاملة تقول و تصر ان مفيش بطالة فى مصر ......................عادى

ويطلع الباشا الوزير يقول ان المواطن يكفية فى اليوم جنية ونص عشان يعيش بيه وياكل ويشرب ويحوش الباقى والبت سعدية تطمع فى الباقى وتطفش................. بردة عادى

لما الحكومة بارك الله فيها ترفع أسعار السلع الغذائية للمرة الرابعة خلال ٤٠ يوماً شىء كويس

و بردة عادى

لكن إن عصام الحضرى يهرب ويسيب الأهلى

ده بقه اللى مش ممكن نسكت عليه ابد

لا بد لنا من وقفه

اوعى تزعل
بس لو جالك ضغط او سكر او حتى شلل رعاش

ده برضه عادى

بداية مطحون

كان العيال اصحابى فى الكلية بيقولوا عنى انى شبة المواطن المطحون بتاع فلاش

مع انى كنت واد فريش وكول وزى العسل ودمى شربات
اه بقول كنت
يعنى فى الماضى البسيط
دلوقتى خلاص لازم الواحد يكتئب لازم , طيب بذمتكم فية فى فى الدنيا حاجة تخلى الواحد متفائل ما هى بايظة من كل حتة الزمالك بيتغلب من طوب الارض والناس بتغرق فى البحر واللى مش لاقى ياكل والمشكلة الاكبر والتى تؤرق الجميع ( حلوة تؤرق دى ) الواد حسنى عبد ربة هيروح الاهلى ولا هيحترف بره كفاية بقى كدة انا مش مستحمل انا مش مكتئب يا جماعة بس خلينا واقعيين هنجيب التفائل دة منين مش من الاخزخانة اكيد يعنى , الواحد اساسا كرة العيش والعيشة واللى عيشينها يعنى محش فاهم حاجة ممنوع تقول لا الوحيدة اللى قالت لا هى الست روبى كل لما اقوله اة يقولى هو لالالالالالالالالالالالالالالالالالالالالالالالالالالالالالالالالا بلاش كلام فى السياسة لنروح ورا الشمس 0

تخاريف

نهاية العالم

عندما يكون الموت هو الوسيلة الوحيدة للحياة

فالإنسان لا يموت مرتين

أنت تحظى بالحياة لمرة واحدة فقط .

كم معركة خضتها في حياتك؟

كم مرة في حياتك قلت لا ؟

كم مرة استطعت أن تحقق أحلامك ؟

كم مرة استطعت أن تثبت ذاتك ؟

كم مرة قدمت فيها تنازلات؟

كم مرة استطعت أن تكون حرا؟

كم مرة كنت من تريد وليس ما أرادوا ؟

كم مرة ثبت على مبدأ تؤمن به ؟

أسئلة كثيرة قد تعرف إجابة بعضها و أخرى تظل أبدا بدون إجابة, قد تعيش حياتك كلها دون أن تصل إلى الإجابة !!!!!!!!!!!